早兩星期，富商梅鐸嘅華裔太座鄧文迪，喺英國國會護夫心切，使出一招「鬼影變幻球」扣殺絕技，擊退企圖襲擊其夫嘅男子，震驚中外。再次印證中國女子運動員，的確非同凡響。
鄧文迪一摑驚人，大家即時起底，先至知道鄧文迪中學期間，仲未放洋留學前，原來係徐州某中學排球隊成員。當時有位教練蔣立模，見鄧長得夠高，知佢非池中物，立即選入排球隊，加以訓練。
雖然蔣教練喺國家隊冇一官半職，只係徐州市一個退休教頭，但曾傳授排球絕技予鄧文迪，等佢可以喺世人面前施展，令中國排球莫測高深技巧再放光芒，難怪蔣教練早前接受訪問時，非常自豪地說：「這真是一個非常有力的扣殺，她很了不起，令中國及徐州都感到驕傲。」
以前香港人睇女排，好多都係受「青春火花」蘇由美或「排球女將」小鹿純子影響，但近二、三十年，當然係我哋中國女排天下。中國女排除鄧文迪外，仲有大把識得收收埋埋，唔聲唔聲嚇你一驚嘅勁人，好似十幾年前郎平突然決定離開中國，到意大利打波甚至做埋美國國家隊教練，就真係估佢唔到，兼且夠晒大膽。
最近當然要數王一梅，佢為世界女排大獎影嘅宣傳相，由純樸素人化身美艷親王，亦令人為之精神一振，頭髮都豎起畀個讚。中國女排集美貌、膽識與智慧於一身，難怪可稱霸世界。
波男