傑志輸波贏掌聲 布力般派三蛋收韁捱噓

雖然決賽波飛早就賣晒，但睇嚟唔係全部球迷都對尋日場季軍戰有興趣，開波初段仍見到大球場有唔少空位，不過在座嘅球迷都非常熱情，氣氛絕對比上周三熾熱。

大球場經過首日兩場激戰後，草地質素明顯差咗好多，龍門口更出現泥多過草嘅情況。不過，喺香港踢慣「薯仔田」嘅「主隊」傑志反而因此攞到着數，加上今仗對手布力般流浪嘅實力比車路士低幾班，令傑志嘅「巴塞式」地面進攻得以復見，初段甚至壓住對手嚟攻。

踢咗23分鐘，賽前矢志入波嘅傑志就出現一個黃金機會，守將曾錦濤喺敵方禁區畀馬田奧臣踢跌獲得12碼，但可惜隊長羅沙度勁射高出，更埋下輸波伏線。布力般大難不死後亦逐漸企穩陣腳，結果喺35分鐘由阿根廷中場莫路科米卡接應艾馬頓傳中插水式頂入，帶住一球返更衣室。

領先歎慢板 球迷開汽水

換邊後雙方都作出多個調動，傑志亦冇自亂陣腳高Q大棍，繼續其地面小組入滲，但布力般藉傑志眾將體能下降反客為主，先喺70分鐘由鄧尼禁區頂射入靚絕罰球擴大比數。領先到兩球後，布力般班球員開始歎慢板搓波，但真金白銀買飛入場嘅球迷難免有啲不滿，更不斷報以噓聲催促佢哋加緊進攻。結果喺84分鐘，碧克文博得12碼並親自操刀中鵠，為布力般贏到3:0完場捧走季軍。