小牛反先3:2

賽前小牛後衞泰利就講過，只要小牛今仗得分喺100分以上，就好大機會擊敗熱火，果然小牛今仗手風順到不得了，三分球19投13中，命中率高達68.4%，只差一球就可追平總決賽三分球紀錄，而整體命中率亦有56.5%，呢個數據係自1991年以來，投籃命中率最高嘅一次，熱火今季亦首次喺季後賽被攻入110分。

大帝「三雙」第四節又唔掂

上仗帶病上陣嘅小牛「德國槍」魯域斯基，今場回復水準，攞到29分及7個籃板，季後賽累積得分高達3193分，排史上第15位。魯域斯基好滿意自己嘅演出：「比賽前仲有啲咳同流鼻水，但退咗燒感覺唔錯，今場全隊球員都發揮水準。」熱火主將勒邦占士雖然取得季後賽第七次「三雙」，但演出卻令人失望，第四節繼續啞火。「大帝」表示：「今場我哋其實發揮唔算差，只係對手表現更好，泰利、傑特、巴利亞個個都入到三分波，輸波都無話可說。」

熱火中鋒保殊仍充滿信心，話只要保住兩仗主場賽事，就可奪得總冠軍。

小牛場數反先熱火，啦啦隊落力打氣有回報。（美聯社圖片）

放大圖片

本報綜合報道