魯殊來季睇好車路士

魯殊由尋日開始，展開一連三日訪港之旅，他昨日喺中環會見傳媒時穿上利物浦白色Polo恤，風采不減當年。魯殊上一次來港已係十年前，佢大讚香港人非常友善，但就講笑話依家天氣熱咗啲。

利物浦目標入前四

問到利物浦來季問鼎聯賽錦標機會，魯殊非常風趣：「自82年起我答咗呢個問題廿幾年，我次次都話利物浦，今次我都惟有咁答，哈哈！但老實講『紅軍』來季目標應該定喺打入聯賽前四。曼聯有雲達沙退休，我覺得車路士係捧盃頂頭大熱，但最後都要睇各支勁旅簽到乜人。」

對於幾名新球員，魯殊身為「紅軍」大使當然有讚冇彈﹕「佐敦軒達臣好有潛質，又係英格蘭人踢慣英超，簽佢係個極佳決定，來季佢會同謝拉特喺中場發光發熱。而安祖卡路爾件頭夠大，任何後衞見到佢都驚，我好希望佢同蘇亞雷斯能盡快建立默契，對提升利物浦成績好有幫助。」

未來兩日魯殊將現身何文田出席青少年足球訓練坊，明日更會親身落場與藝人踢七人友誼賽。