希活重創總決賽拜拜

小牛爭標受到打擊!上仗復出嘅替補中鋒希活,打咗三分鐘就再度受傷,經檢查後證實傷勢嚴重,可能喺總決賽都無法上陣,大大加重咗中鋒贊特拿嘅負擔,亦削弱咗小牛嘅內線威力。今早小牛再於主場迎戰熱火,賽前明言要重振雄風嘅「大帝」勒邦占士勢必爆發,睇怕今場小牛將處下風。(高清翡翠台、now 635及有線165台周五早上9時直播)

同小牛簽咗六年5,500萬美元(約4億3千萬港元)合約嘅希活,喺小牛一直發揮重要嘅作用,但總決賽前佢右臂受傷,一直帶傷上陣,缺席咗總決賽第三回合賽事後,佢一心諗住喺第四回合復出,點知打咗一陣又再次觸傷舊患,軍醫認為佢再喺總決賽上陣嘅機會極唔樂觀。

傳杜域侯活加盟湖人

希活表示:「上仗我落場時,幾乎郁都郁唔到,醫生話我嘅傷勢最少要抖四至五個星期,但我希望可以喺四至五日內復出,因為球隊需要我喺內線支援。」

此外,有報道指湖人來季會大換血,「魔獸」杜域侯活及勇士射手艾利斯都有機會加盟,其中杜域侯活女友之前喺加州生活,所以極希望「魔獸」可到洛杉磯打波。