早前國際足協會長競選戰，白禮達火併哈曼可謂兩雄相遇，結果爆出賄選醜聞，哈曼敗陣，本身係亞洲足協會長嘅哈曼更因涉嫌「派餅仔」被停職，第一副會長張吉龍就冷手執個熱煎堆做咗執行會長，龍哥上位，內地球迷即時反應就係：今屆世盃外圍賽，中國有計！
龍哥係中國足協官員，八十年代開始參與亞洲足協同國際足協事務，北京奧運期間亦做過奧組委體育部部長，佢嘅主要工作係對外交流，近年中國足球腐敗貪污事件，完全唔關佢事。
十年前中國隊歷史性取得世盃決賽周出線權，球迷淨係記得米路天奴域、范志毅同郝海東，當年嘅幕後功臣就係張吉龍，龍哥巧妙利用抽籤規則，令中國隊抽得與阿聯酋、烏茲別克、卡塔爾及阿曼一組嘅絕世好籤，協助中國隊成就大業。
龍哥行運一條龍，依家做埋亞洲足協執行會長，哈曼案件未搞掂之前，佢就係亞洲一哥，下星期會到吉隆坡總部上任履行職務，而龍哥亦做慣管理人員，佢話上任後會推行大變革，令亞洲足協工作更加透明，防止腐敗。
至於中國隊應該點配合，呢個問題就比較複雜，波男認為最簡單做法就係嗱嗱聲搵外國教練，反正米路未退休，搵佢返嚟同高洪波拍檔都唔錯，然後再慢慢執。正所謂你想個仔讀名校，都要事前做足準備，請多幾個補習老師落足料催谷，然後先至到上面班人做嘢，係咪？