熱火重溫東岸冠軍
公牛演了45分鐘好戲，但熱火僅用3分鐘，就將結局完全改寫！公牛昨日在非勝不可嘅Game5一直領先，在賽事剩餘3分鐘時，更有多達12分優勢，可惜輕率係要付出代價，公牛在最後3分鐘連續犯錯下，被熱火兩巨頭勒邦占士及韋迪連番得分，反勝83比80完成驚天逆轉。熱火以總成績4比1晉級，球會史上第2次成東岸冠軍。
或許年輕就係奪冠最大阻力，雷霆在西岸決賽數度因尾段犯下愚蠢錯誤而遭小牛淘汰，另一支年輕力量公牛亦重蹈覆轍。公牛在今場「生死戰」一直保持領先，朗尼比華在剩餘3分多鐘時先入一記三分波，繼後再入一個罰球，助公牛拉開12分優勢，當時球員已歡喜若狂地慶祝。
大帝閃電俠齊做「關鍵先生」
不過經驗老到嘅熱火兩巨頭並未因此放棄，勒邦占士與韋迪僅用3分鐘，就打出14比2嘅攻勢追成平手，當中「大帝」入咗兩球三分波，而韋迪就打出一次「3+1」，射入三分球再博得戴歷羅斯犯規。公牛被追平後陣腳大亂，最後一擊再次留給領袖戴歷羅斯，可惜羅斯仔重複犯錯，強行起手被「大帝」封阻。
「大帝」再一次成為熱火救世主，個人取得28分、11個籃板、6次助攻、3次搶截及2次封阻，其餘兩巨頭韋迪及保殊分別貢獻21及20分，值得一提係最後3分鐘所取得嘅18分，全由三巨頭包辦。同時勒邦占士成為NBA史上最年輕季後賽「2400分+700籃板+600助攻」先生，較「波神」米高佐敦及高比拜仁早3年獲此數據。
熱火事隔5年後再成東岸冠軍，適逢06總決賽對手又係小牛，當年熱火就係憑「閃電俠」韋迪領軍下，以4比2贏得球會首個總冠軍，但06冠軍成員就只剩「閃電俠」及夏士林。總決賽將在香港時間6月1日（周三）早上開始，賽事為2-3-2，熱火先在主場出擊。
