雷霆轟破小牛地獄主場
小牛主場館美國航空中心，素來有「地獄球場」之稱，小牛在今季季後賽亦從未失手，不過尋日終打破齋缽，雷霆藉後備兵占士夏登爆發射入23分，以106比100險勝小牛，打破對手主場不敗身，總場數追成1比1。
今場比分咬得非常緊，小牛完三節後僅落後1分。不過雷霆在第四節尾段開始拋甩分數，賽事剩餘3分多鐘時，占士夏登射入三分後，協助雷霆打出一段8比0攻勢，拋離小牛10分。雖然小牛完場前36秒藉魯域斯基嘅罰球追成4分之差，可惜史杜積高域在關鍵時刻射失三分波，未能追貼比分，最終小牛以6分敗陣。
占士夏登最搶鏡
今場為雷霆攞分最多嘅依然係領袖杜蘭特，佢攻入24分，但三分球卻5射0中。反而雷霆班後備交足貨，占士夏登射入4個三分波，全場入23分並搶得7個籃板及作出2次偷波，表現最Sharp。雷霆追成1比1平手後，Game3會在周日早上舉行，由雷霆主場。
本報綜合報道