青訓搞得差玩死港足

潘嘉明：踢波點搵食？

昨日紀念賽共有兩場賽事，頭場由足總邀請隊對銀禧歷程邀請隊，落場球員除部分球會高層和球圈人士外，大部分都是昔日體院青訓「產品」，雖然事隔多年，但他們對當年體院足球部遭解散一事仍耿耿於懷，深感惋惜。其中曾効力流浪和快譯通的前港青及奧運隊主力潘嘉明，就直言當日將體院足球部解散，等同判了香港足球死刑，他說：「想當年我哋碰上東南亞對手，係香港六，人哋四架！依家？變咗人哋六、我哋四！你冇一個地方，集中得嚟又有系統咁去訓練，咪搞到冇技術、冇體能囉！」

事實上，近年青訓計劃不及以往完善，導致缺少新一代球星冒起，一直受到批評。

「哨牙潘」補充：「推行咩計劃都係假，成日話唔夠本地球員、冇後生仔願意投身足球，你都要畀人哋睇到有前景先得架！我有仔，我都唔會畀佢踢波搵食啦！」

王曉剛：全靠朋友幫手

其實，接連有退役球員離世，亦令球員退役後生活成為社會話題，昨日有份出席紀念賽的前甲組球員，雖然各自有自己的故事發展，但背景相近都係要「靠自己」！與蔣世豪同期出道的「傻剛」王曉剛，當被問及當日退役生活時道：「『豪豬』當年喺樸茨茅夫盃2.8秒入波，但賽事ＭＶＰ係我攞架！咁又點？結果我未夠廿歲就退役，邊個幫我呀？咪又係要靠自己！我近兩年全靠前體院隊友陳德利幫手，先幫佢打工，依家自己做老細，經營機場同酒店嘅專車接送，旺季嗰陣一個月都有5、6萬收入架。呢啲都係靠自己去搵朋友幫手，政府冇幫過我！」

潘嘉明

王曉剛

簡永康：難望政府幫你

例子相近的還有前五一七及西貢門將簡永康，花名「大口」的他強調自己十分好彩。「我99年退役，好彩有親戚係做食肆同賓館裝修生意，我跟佢做，先唔使擔心生活，做咗咁多年依家總算兩餐無憂。同其他球員比較我算係好好彩，唉……退役之後點，好難望政府會幫你，都係要靠自己。」

至於昨日尾場香港隊對愉園開賽前，足總為蔣世豪進行悼念儀式，現場播放「豪豬」昔日比賽及訪問片段，足總正、副主席梁孔德及貝鈞奇致辭，最後由蔣世豪遺孀向球迷鞠躬致謝。

籌款68萬 戶口續受捐獻

足總為「豪豬」家屬開設的籌款戶口暫籌得68萬港元，該戶口繼續接受各界人士捐獻，直至本月卅一日。