塞爾特人玩火自焚
「大帝」憤怒了！一間網上衣服店趁母親節期間惡搞「大帝媽」哥莉亞，設計了一款影射佢同塞爾特人後衞韋斯戀情嘅Tee，並且公開售賣。已經同「大帝」反目嘅韋斯就揸住件衫影相，擺明要惹怒「大帝」，結果勒邦占士將憤怒化成動力，昨日攻入全場最高嘅35分，領熱火加時後贏塞爾特人98比90，總場數領先至3比1。
暗諷韋斯大帝媽關係
眾所周知「大帝媽」在上季季後賽期間，被踢爆與勒邦占士隊友韋斯有染，令「大帝」大為震怒，之後佢仲棒打鴛鴦，逼騎士高層送走韋斯，遠離母親。如今兩人都先後離開騎士，點知又要喺季後賽碰頭，一間專撐波士頓球隊嘅網上衣服店，日前就借母親節「惡搞」對手占士媽媽哥莉亞。
話說呢間公司設計咗一款Tee名為Delonte Mother's Day（韋斯母親節），Tee上圖案係一個卡通韋斯，笑笑口拎住咗一件寫上JAMES名字嘅6號波衫，但波衫上除咗6號之外還加了一個9字，由於「69」係一個性愛姿勢名稱，而JAMES亦都係哥莉亞嘅姓氏，難免令人聯想到呢件Tee正在揶揄「大帝媽」曾經同韋斯有過關係。最頂癮係韋斯賽前竟然拎住幅相合照，擺明想辣「大帝」。
熱火加時贏波領先3:1
結果占士果然冇令佢失望，昨日作客波士頓轟入35分同14籃板球，加上另外兩巨頭韋迪及保殊亦分別貢獻咗28及20分，「三巨頭」主宰賽事下，最終加時後以98比90擊敗綠軍，場數領先至3比1，只要周四早上贏多一場，就可以打入東岸決賽。
同日另一仗，作客嘅雷霆打到三加時，以133比123擊敗灰熊，將場數扳成2比2平手。
本報綜合報道