湖人巨塔 失戀崩塌 弊傢伙 加素有咗
西班牙天王加素自加盟湖人後，與拜林組成了全聯盟最堅韌嘅雙塔，連奪兩冠風光一時，可惜佢喺今季季後賽竟變成「軟蛋」，守唔住小牛「德國槍」魯域斯基，連累湖人在次圈連敗陷入劣勢。據美傳媒爆料，原來加素之所以跌Watt係因為畀女飛，冇晒心機比賽之餘，仲要放縱自己搞出個大肚腩，唉，難得一身好本領，情關始終闖不過！
其實加素在首圈對黃蜂時，已經因為嘜唔實名不經傳嘅蘭特利而備受抨擊，勢估唔到在次圈遇上小牛，更被魯域斯基玩弄於股掌之中，讓後者大爆發，結果頭兩場主場賽事輸晒，加素在第二戰更慘遭主場球迷狂噓添。
美傳媒踢爆失準之謎
不過先別怪責加素，因為據美傳媒《Terezowens》指出，原來加素之所以低迷，係因為佢女友Slivia在季後賽期間突然提出分手，令加素大受打擊，嚴重影響場上表現。據加素身邊嘅人透露，加素被飛後對任何事都失去動力，當中包括為湖人爭奪總冠軍，而球隊上下亦知道內情，只可惜都冇法幫加素尋回鬥志。
自暴自棄「腹肌合體」
唔單只咁，加素受情傷後仲開始放縱自己，有可能因為暴飲暴食而令六舊腹肌變成一舊肥膏，而加素嘅肚腩照近日曝光後，亦備受傳媒批評。
加素與西班牙著名啦啦隊Dream Cheers成員Slivia，在上年世界籃球錦標賽邂逅就隨即撻着，想唔到兩人咁快就玩完。另方面，阿堤斯在上場惡意侵犯小牛控衞巴利亞，聯盟決定罰佢停賽一場，因此阿堤斯今朝Game3將無法上陣。
本報綜合報道