香港中英混血兒夏志明早前在西班牙參加青少年比賽期間，受到巴拉圭球會瓜蘭尼垂青，球會副主席親自游說，希望帶佢返南美栽培成材，依家夏志明心大心細，究竟去定唔去？根據幾位球星嘅經驗，如果夏志明想喺球圈闖一番事業，老虎都要去！
幾十年來本地球員出外經驗唔算多，最著名係六十年代「阿香」加盟英國黑池，之後就數到八十年代尾李健和短暫効力新加坡芽籠，近年就有吳偉超北上中超闖蕩，出外發展球員只得寥寥幾人，原因唔係香港球員冇人搵，而係因各種理由拒絕出外！
已經退役嘅歐偉倫，十九歲時曾獲荷蘭球會睇中，不過當年香港球市仲係好景，阿倫選擇留喺香港，雖然阿倫後來發展亦算唔錯，係本港數一數二嘅代表人物，但係諗番轉頭，若然當年佢去荷蘭浸鹹水，哪怕只係一年半載，佢嘅成就肯定更高。
據夏志明講，瓜蘭尼好有誠意邀請佢，原因係對方好欣賞佢嘅速度同膽識，好有潛質，巴拉圭球會正缺乏佢呢類球員，因此願意栽培佢咁話。
夏志明將件事交畀父親同所屬球會傑志考慮，不過其實最終決定權都係球員自己，既然有更高水平球隊咁有誠意提出斟介，其實夏志明一試無妨，當係增長見識又好，提升自己又好，始終呢類機會唔係經常有，如果錯過咗，第日必定後悔。
傑志金眉教練甘巴爾講得啱，香港球員並唔係差，問題只係上進心唔夠，唔夠信心去挑戰更高層次足球，否則以夏志明今次嘅「畸士」，使乜諗咁耐？