排名較低嘅灰熊與黃蜂齊齊爆冷贏波，一眾棄將可謂吐氣揚眉！其中今季被火箭放走嘅老將柏堤亞，在完場前23秒射入關鍵三分為灰熊奠勝，成為贏波最大功臣，原來柏堤亞尋日雙喜臨門，贏波之餘仲喜獲千金。
已經32歲嘅柏堤亞，今季在交易截止日前被一心重組嘅火箭送走，但估唔到重返灰熊反而令事業重上高峰。柏堤亞完場後即更新Twitter：「最瘋狂的一天！除投入奠勝球之餘還迎來新家庭成員，感謝上天！」
其實柏堤亞太太早在交易前已懷孕，所以一直留在休斯敦安胎，估唔到囡囡會在撞正季後賽首戰出世。
至於近年常被指為球場毒瘤嘅蘭度夫，加盟灰熊後亦用表現擺脫惡名，在灰熊贏得首場季後賽勝利後，就傳出灰熊已開出一紙4年7,100萬美元（約5.5億港元）「肥約」，希望留住呢位29歲大前鋒。