捧熱火?把幾火!

熱火五連敗!昨日NBA熱火兩大主力韋迪同勒邦占士,雖然都取得三十分以上,但主場仍以九十六比一○五不敵拓荒者。賽後熱火三巨頭之一保殊埋怨冇波到手,而傳媒更踢爆早前喺更衣室因輸波而飲泣嘅球員就係「大帝」占士,熱火目前處境相當險峻,香港時間周五早上主場出戰湖人有隱憂!(now 635周五早上8時直播)

保殊埋怨分波唔勻

熱火早前羅致控衞碧比,理應令陣容更強大,但黃金陣容唔係贏波嘅保證,碧比加盟後,熱火四場波都落敗,令人懷疑呢個交易係咪正確。其實熱火今場同拓荒者一直咬得好緊,但去到第四節熱火開始手緊,而且全無合作可言,僅靠占士同韋迪個人突破取分。

勒邦占士同韋迪今仗包辦咗熱火一半以上嘅投射,韋迪取得三十八分,而勒邦占士亦有三十一分,但其他球員冇一個得分喺十分以上。身為第三巨頭嘅保殊,雖然賽後埋怨冇波到,但其實佢都有十一次投射,可惜僅入三球得七分進帳。

傳媒爆大帝係喊包

「大帝」表示:「我都唔知點解會五連敗,但我肯定依家唔係我哋嘅低潮,就算依家開始我哋一直輸落去,我哋依然可以打入季後賽,我同韋迪絕唔會意志消沉。」對於教練史普斯達話上仗輸波後有人喺更衣室度喊,傳媒更估計係「大帝」,但占士依然唔介意:「無論教練講咩都好,我都好支持,就算有人輸波後喊,都係為球隊好,我哋仍然好團結。」此外,占士近期可謂諸事不順,最近被亞特蘭大一間夜總會控告佢甩底冇出席活動,並要求賠償,此事已鬧上法庭。

本報綜合報道