高比仔成史上第十名得分王

助湖人炒活塞25分

湖人上仗輸完畀灰熊後，積遜教練即時黑晒面，並公開批評兩名主將高比拜仁及阿堤斯嘅表現。高比仔向來較為受教，坦言積遜教練咁講，只係為球隊好，所以今仗亦多作助攻，積極同隊友配合，結果湖人大勝活塞25分，而阿堤斯亦有不俗表現，交出8分、3個籃板、4次助攻及兩個偷波嘅全能數據。

經過今場比賽，高比仔嘅累積得分已達到26,671分，只差第九位嘅「三雙王」奧斯卡羅拔臣39分，由於第六至第九位嘅球員早已退役，高比仔如果喺餘下球季冇傷冇病，相信好快就可以超越晒佢哋，而史上得分王頭十名之中，亦只得高比拜仁同奧尼爾係現役球員。

韋迪領熱火獵鹿

至於另一隊NBA擂台躉熱火，尋日主場亦以101比89擊敗公鹿，近20場賽事取得19勝1負，熱火「三巨頭」勒邦占士、韋迪及保殊合共取得78分，最搶鏡係「閃電俠」韋迪，佢總共攞咗34分，由於熱火嘅主場館租咗畀馬戲團，所以熱火未來十日會連打五場客場賽事。

本報綜合報道