男人煩惱不外乎錢同女人，但對於做咗老竇嘅男士嚟講，最唔放心始終都係寶貝仔女。熱火領袖韋迪最近就被兩子嘅撫養權煩到陀陀擰，整個夏季不斷穿梭律師樓同法院，期間更遭前妻指控虐兒、虐妻、藏械同吸毒，大大影響其開季準備。心力交瘁嘅「閃電俠」首場季前賽即告拉傷，要缺席餘下季前賽事，似乎韋迪一日未解決私人問題，熱火衝冠都存有隱憂。
自○七年宣布與前妻芬卓絲婚姻破裂後，韋迪就一直受離婚事情所困擾，雖然佢同前妻於今年終於正式辦妥離婚手續，但跟住兩個八歲同三歲嘅囝囝嘅撫養權就變成漫長戰役。韋迪早前拒絕參與世界籃球錦標賽，目的係希望在抖暑期間爭取兩子嘅撫養權：「家庭對我來講好重要，只要兩個仔留在我身邊，我才有力量做事。」
韋迪原定在上月尾已經可以解決撫養權問題，可惜事與願違，因為其前妻不斷向法院提出新證供，如指控韋迪曾在家中虐待佢，而後者又試過遺棄兩子，仲有藏械及吸毒，不過韋迪於日前上庭時已否認所有指控，並建議法官將撫養權判給自己。
由於法院宣布會延期判決，因此韋迪在NBA新季展開後，仍要分心處理私事。其實事件的確對韋迪造成嚴重困擾，今季首場季前賽面對活塞，心神恍惚嘅韋迪就於一次防守上拉傷右腳筋，預計餘下季前賽都會缺席，更有可能無法在十月廿六日（美國時間）嘅開鑼戰落場鬥塞爾特人。
年齡：28歲
出生地：芝加哥
國籍：美國
身高：6呎4吋
球會：熱火（03年至今）
榮譽：06NBA總冠軍及總決賽MVP、09得分王
文：梁嘉輝