除咗同前妻爭撫養權之外，其實韋迪亦要同新隊友勒邦占士爭熱火龍頭位置。「閃電俠」多年以來都屬隊中大哥，又立下唔少汗馬功勞，理應屬球隊第一領袖，不過熱火總裁萊利同教練史普斯達均暗示，「大帝」先係熱火新任領軍人選，韋迪可謂四面受敵。
雖然教練史普斯達未有直接指出占士係隊中領袖，但佢就透露「大帝」毋須改變打法，只要好似騎士時代橫行無忌就可以，意味佢會以占士為攻擊重心。
至於萊利講得更加直接，話占士已經係熱火嘅新領袖。不過另一巨頭保殊就較為中立，認為「大帝」同韋迪都係球隊大哥，可一同帶領熱火步向勝利。