皮雅斯絕殺 塞爾特人三度滅火
老將發火，非同小可！塞爾特人老牌射手皮雅斯昨日領軍作客邁阿密，雖然尾後被主隊熱火一度追平分數，但皮雅斯挺身而出射入絕殺一擊，協助「綠衫軍」險勝100比98，亦係季後賽首支球隊首圈領先3比0，出線機會高唱入雲。可憐輸波嘅熱火尾段有韋迪射失關鍵波兼扭傷左腳退下火線，眼白白睇住皮雅斯絕殺。
當騎士及湖人等一眾奪標大熱，相繼被對手追貼場次之際，「老人院」塞爾特人卻表現穩定，昨仗作客熱火更有加納特停賽後復出，結果三節過後「綠衫軍」領先80比72。不過熱火第四節逐步追近，戰至最後1分半鐘更憑杜利胡禮射入三分追成98平手，可惜韋迪喺剩餘13秒時浪費最後一擊，最慘係射失之餘仲要落地弄傷左腳，要提早離場。結果皮雅斯最後關頭使出拿手嘅跳射，絕殺成功，助「綠衫軍」險勝100比98。
馬刺冇三分波照贏小牛
綠軍「三巨頭」昨仗均表現出色，其中皮雅斯攻入全隊最高32分，而雷阿倫及加納特分別有25分及16分進帳。皮雅斯賽後未敢自滿：「雖然我哋已領先3比0，但仍然要認真看待熱火，唔能夠輕敵。」至於賽後證實傷勢並唔嚴重嘅韋迪，亦盛讚皮雅斯：「偉大嘅球員射入偉大嘅入球！」兩軍將會在香港時間周一凌晨展開第四回合交鋒。
另邊廂，馬刺憑鄧肯貢獻25分，另外真路比利被打爆鼻下仍攻入15分及7次助攻，成功喺主場以94比90擊敗小牛，總成績反先2比1。值得一提係馬刺今場竟喺一球三分波都未入過之下贏波，都算犀利！
本報綜合報道