經過長達十個月嘅養傷期，火箭球星「T-Mac」麥基迪尋日藉阿利沙停賽，終於獲得教練阿杜文首肯，首度獲准披上今季新轉嘅3號球衣對活塞！雖然麥基迪只係短短上陣7分多鐘，但阿杜文賽後已表示收貨，仲話餘下賽事會繼續畀機會佢出場，將「T-Mac」解凍。

教練收貨續派上陣

年薪達到2,284萬美元嘅「打工皇帝」麥基迪，自從二月份做完手術後，一直未有在正式比賽中上陣，就算已經傷愈，亦不獲教練阿杜文徵召。不過，基於阿利沙早前對速龍時「批㬹」，被罰停賽一場，所以阿杜文決定首次將麥基迪納入陣容，並喺首節剩餘7分多鐘時派佢上陣。

相隔309日後復出嘅麥基迪，身形明顯發福不少，速度及手感亦似乎不及從前，不過麥基迪總算射入一記三分球，獲得3分及3個籃板球，但首節過後就再冇落場。教練阿杜文賽後表示：「我知道麥基迪喺進攻上並冇問題，但我想觀察佢能否防守自如，因其移動速度及比賽狀態都未達標準，所以仍需時間恢復過來。」不過阿杜文已承諾，餘下五日戰四場嘅魔鬼賽程，會繼續讓「T-Mac」上陣。

因作客嘅活塞今場續缺兩大主力普林斯及哥頓，所以未能打出應有水準，火箭最終以107比96贏波，基中布魯克斯及史高拉同樣獲得23分，成為贏波功臣。