日前「閃電俠」韋迪向「老友」「大帝」勒邦占士隔空傳話，公開表示希望兩兄弟下季一齊打江山，估計大有可能殺入紐約加盟紐約人，令球迷極度期待！尋日兩大當家球星正面交鋒，一見面攬頭攬頸在所難免，「大帝」並冇否認同韋迪合作嘅可能性，「閃電俠」拍「大帝」嘅雙雄組合，下季隨時成真。

由於占士及韋迪下季都有權跳出合同選擇自由身轉會，所以唔少球隊早喺一兩年前已騰出薪酬空間，迎接二○一○年嘅來臨。韋迪日前就開腔，話有意在下季同占士拍住上，組成比米高佐敦與柏賓更強嘅雙人組合，雖然韋迪之後改口話可能性不太，但已令球迷雀躍不已。

老友碰頭 騎士滅火

事實上，韋迪同占士情同手足，就連去澳門夜蒲都拍住上，所以下季並肩作戰絕對有可能。但基於騎士嘅總薪酬空間，只能簽下一個頂薪球員，相反韋迪母會熱火來季就有權簽入兩名頂薪球員，所以估計占士有機會登陸邁阿密。當然，紐約同樣係兩位球星嘅落腳熱門地，只要占士肯離開克利夫蘭，「閃電俠」拍「大帝」就好大機會成真。

兩位球星尋日作出正面交鋒，咁好戲碼就連「波神」米高佐敦及昔日好拍檔柏賓都係座上客。結果占士喺偶像面前同韋迪上演「得分大戰」，占士攻入34分及7個助攻，而韋迪仲叻轟入36分，不過贏波嘅就係「大帝」，騎士作客以111比104擊敗熱火。

23退役 大帝做6號仔

「大帝」賽後照舊拒絕透露轉會意向，亦唔回應韋迪嘅言論，仲大耍太極話只係想同米高佐敦同隊。不過占士的確好尊重「波神」，基於NBA決定將各隊嘅23號球衣退役，以尊敬佐敦嘅貢獻，所以「大帝」來季會改穿6號球衣。

■本報綜合報道