高爾夫球重新列入奧運項目，令有「高爾夫奧林匹克」之稱嘅高爾夫世界盃更受重視，廿八個參賽國家及地區紛紛組成強隊參賽，星級球手計有西班牙名將加西亞、英國好手鮑達及愛爾蘭新星麥洛萊，東道主中國隊繼續由張連偉夥拍梁文冲，賽事將於本月廿六至廿九日在深圳觀瀾湖舉行。

賽會表示，自兩年前世界盃落戶觀瀾湖開始，入場觀眾逐年遞增，由○七年吸引十五萬觀眾入場，去年上升到十八萬，而今屆撲飛及預訂酒店情況超越去年，入場人數可望突破二十萬。

朱樹豪首領「朱樹豪獎」

大戰之前，觀瀾湖喜事重重。高爾夫球界嘅「諾貝爾獎」誕生，全球最權威嘅美國職業巡迴賽宣布，以觀瀾湖高爾夫球會主席朱樹豪名字命名，設立「朱樹豪獎」，亦係國際體育界第一個以中國人名字命名嘅永久獎項，以後每年頒發。

第一屆「朱樹豪獎」得主，正是朱樹豪本人，並由美巡賽專員蒂姆芬臣在觀瀾湖頒獎，現場有過千人觀禮。