本文重點
不炒不炒還須炒！由於黃蜂開咧成績差，○七年最佳教練史葛正式被解僱，黃蜂並宣布由球會ＧＭ保華暫代帥位，球員得悉後都讚好。大前鋒大衞韋斯就話，史葛愈嚟愈自負，成為黃蜂走下坡嘅主因，而球員亦開始唔信任佢。既然庸帥已走，聽日作客鷹隊，黃蜂有機會打出驚喜。（有線165台及體育台62周日早上８時直播）
搞好士氣增拚勁
黃蜂今季持續低沉，開咧後僅得３勝６負，結果球會尋日正式畀「大信封」史葛，史葛亦繼艾華利莊遜及米曹之後，成為近年第三位最佳教練得主被炒。其實史葛都算死有餘辜，皆因佢自從○七至○八年球季交出56勝26負嘅驕人成績後，近兩季竟大幅退步，而且又唔受球員歡迎，班細嘅唔肯為主帥搏命，黃蜂點會交得出成績呢！
不過黃蜂班底始終唔差，除咗有「蜂王」基斯保羅外，又有大衞韋斯及史杜積高域等幫手，所以炒咗史葛搞好士氣後，隨時可以打番前季水準。
黃蜂聽日作客鷹隊，球員點都會打醒十二分精神，博表現取悅新帥，呢場大有機會打翻身戰。