本文重點
【本報綜合報道】一眾渴望重生嘅球隊，不約而同地等待着二○一○年轉會市場，全因勒邦占士、韋迪、保殊及史杜達米亞等超級球星，都有權在今季之後跳出合同成為自由身，選擇改投新東家。紐約人及籃網都被譽為最有機會得到「大帝」，但被指可左右「大帝」思想嘅Jay-Z賽前就話，唔會打「友情牌」要占士離開騎士。
否認為籃網做說客
今場都有去麥迪遜公園睇波嘅著名Rapper Jay-Z，向來同占士情同手足，而占士亦唔只一次講過任何事都會詢問「契哥」Jay-Z意見，所以若然占士選擇轉會，Jay-Z肯定有力左右大局。
咁啱Jay-Z又係籃網股東之一，難怪唔少傳媒都預測過，若然籃網能夠搬遷到布魯克林嘅話，占士改投籃網嘅機會將會相當高。不過Jay-Z賽前表明，自己唔會介入籃網斟占士嘅事情上，皆因占士係佢老友，佢最希望係朋友効力一支最有競爭力嘅球隊。但佢亦補充話，只要占士加盟，籃網一定夠條件去爭標。