本文重點
「大帝」勒邦占士尋日揮軍去到「私人主場」麥迪遜公園比賽，眾所周知紐約人心儀「大帝」已久，所以主場球迷自然充當「助選團」，舉牌、喊口號熱烈歡迎呢位未來「紐約大帝」！結果占士一如過往，喺麥迪遜公園大演個人騷，助騎士輕鬆以100比91擊敗紐約人。
除咗「大帝」之外，占士近年來都多咗個稱號「麥迪遜先生」，全因呢位天之驕子次次嚟親紐約打波都上晒身，近十次到訪平均奪得30.1分，上季更單場轟入52分，睇嚟麥迪遜公園遲啲都要改名做「大帝公園」。
洋基隊做媒冧招盡出
無他嘅，紐約人為咗喺下季得到占士加盟，球迷梗係識做，次次都熱烈歡迎「大帝」，搞到佢打起上嚟得心應手，而今次就連老友Jay-Z及占士至愛棒球勁旅紐約洋基隊幾位成員，如洛迪古斯都專誠到場撐場，擺明要留個美好回憶畀占士，等佢下季選擇改投紐約人。
事實上今場戰果已經唔重要，因為紐約人早已騰出晒薪酬空間，放眼下季賽事，所以主隊就算輸91比100，球迷一樣咁開心。「大帝」賽後大讚今場夠氣氛：「麥迪遜公園氣氛很好，場內又有好多明星觀戰，令我有一種好特別嘅感覺，希望能夠在支持者面前盡情表現自己。」占士今場上陣36分鐘就攻入33分、8個籃板及9個助攻，而且投射命中率更達到七成以上。
不過，當問及下季會唔會選擇紐約人時，占士則繼續保持神秘，只稱自己有可能加盟任何一支球隊，但經過愉快一夜後，相信「大帝」都對紐約人加晒分，大有可能下季轉投新東家。
■本報綜合報道