慘！慘！慘！「小巨人」姚明上仗因左腳踝扭傷離場，經詳細診斷後證實骨裂，雖然毋須做手術，但至少要抖八至十二周，火箭官方無奈公布姚明嘅季後賽之旅正式結束！左腳一直係姚明最脆弱嘅部位，今次係佢第三次因左腳受傷而提早收咧，連姚明都冇埋，睇怕火箭都好難鬥贏湖人囉！
細微骨裂毋須手術
喺季後賽愈打愈好嘅姚明，次圈第三回合奮戰扭傷左足踝拐住離場。火箭軍醫表示，最初嘅檢驗結果只係扭傷，但翌日深入診斷後，發現左腳踝位置出現一條細微骨裂，為咗防止情況惡化，姚明需要戴上腳部定位保護，避免走路時令骨頭產生偏移。好彩今次傷患並唔算嚴重，毋須做手術，休息八至十二周就可康復。今次亦係姚明繼○六及○八年後，第三次因為左腳受傷提早收咧，不過佢就話，今次冇以往咁難受。對於火箭嚟講，呢個消息絕對係晴天霹靂，球隊今季已有麥基迪及莫湯保收咧，如今連姚明都冇埋，要喺次圈淘汰湖人真係難過登天。
殿堂教頭戴利病逝
另一個令人惋惜嘅消息，係曾經執教活塞及夢幻一隊嘅殿堂級教頭戴利因病離世，享年七十八歲。戴利於今年二月證實患上胰線癌，雖然積極治療，但最終仍不敵病魔。戴利最令人難忘係創立粗獷打法，八十年代運用一班「壞孩子」如洛文、湯馬士等名宿，帶領活塞兩奪NBA總冠軍，其後更成為夢幻一隊主帥助美國奪金。
本報綜合報道