本文重點
今年注定係「大帝」天下，勒邦占士尋日作客亞特蘭大豪取47分，結果領騎士大勝鷹隊97比82，大有機會繼首圈後再一次橫掃對手；另一方面，占士老死安東尼亦好巴閉，作客達拉斯攻入31分，當中射入絕殺三分球更成為球隊救世主，最終領金塊險勝106比105，領先三比○下，進身西岸決賽呼聲高唱入雲。
「大帝」47分射殺鷹隊
上半場僅領先一分嘅騎士喺第三節開始上力，尤其尾段打出一波八比○攻勢，拋開七分距離。客隊末節愈戰愈勇，賽事剩餘五分多鐘時已領先十五分之多，最終以97比82贏波。占士今場攻入47分、12個籃板球及8次助攻，狀態持續勇猛。
西岸方面，小牛喺最後關頭輸波認真慘情。賽事剩餘6.7秒時，金塊暫停後由安東尼射入三分波反勝106比105，取得非常重要嘅作客勝仗。現時金塊總成績領先至三比○，與騎士一樣，只要明日再贏一仗就可進身分岸決賽。安東尼今場貢獻31分及8個籃板球，而比立斯則有32分進帳；縱然魯域斯基亦攻入33分及16個籃板球，但可惜未能助小牛贏波。