本文重點
騎士係今季季後賽「風頭躉」，自然新聞多多，最近美國《體壇周報》就爆料，指美籍華人黃健華正嘗試收購騎士股份，據報呢位體壇大亨嘅收購之路更由香港開始，近日成功在港註冊一間名為「騎士聯盟」嘅公司，似乎對收購騎士志在必得。
現年四十五歲嘅黃健華，出生於中國廣東省，於美國生活超過二十年，亦係第一位踏入紐約證券行交易所嘅華人。近年佢轉戰體壇，係火箭老闆阿歷山大旗下公司火箭資本嘅董事經理兼資深合夥人，同時亦係美國著名職棒球隊紐約洋基嘅合夥人兼大中華區推廣人。此外，他亦有注資中國職業棒球聯賽和青年棒球聯賽，絕對係體壇大亨。
魔術迎76人有隱憂
據悉黃氏現時正嘗試收購騎士一定數量股份，一旦成功嘅話，有可能成為騎士最大控股老闆，並成為首位華人擁有ＮＢＡ球隊。雖然根據條例，收購ＮＢＡ球隊必須通過多支球隊老闆同意先可成事，但據報其近日已在港成功註冊一間準備投資中國體育產業，名為「騎士聯盟」嘅公司，目的就係想加快收購進度。
除咗收購之外，勒邦占士亦有好消息，皆因佢被選為四月份最佳東岸球員，繼加納特後，ＮＢＡ史上第二位球員一季內四奪每月最佳球星。至於騎士勁敵魔術，明日凌晨就會主場面對76人，因主力陶告魯及劉易斯喺常規賽尾相繼受傷，縱然今場可以復出，但狀態仍成疑問，今場都係揀受讓嘅76人穩陣。