我叫Leo，係香港巴塞足球學校嘅前鋒，今次旅程好開心，除咗有歐聯睇，我仲喺對羅馬一仗有波入，雖然我哋最後都輸波，但能夠幫球隊破蛋，就算輸都冇咁難睇。
羅馬青訓喺世界上咁出名，所以我同好多人一樣，賽前都諗住會輸，當然更加冇諗過會有波入。其實都要多謝Enson出個波出得靚，我先至有機會撞射遠柱入網。賽後爸爸仲同我一齊合照留念添！
我當初學踢波都係因為爸爸。記得○四年歐洲國家盃後，有次行街經過運動舖，爸爸同我一時興起，就買咗個足球返屋企，結果我就愛上咗踢波，之後亦有參加足總嘅青訓計劃，踢踢吓仲入埋巴塞足球學校添！我自己雖然踢前鋒，但最鍾意嘅球員係巴塞後衞碧基，點解？因為佢好波，而且仲踢過曼聯！
馬翊晉10歲 葛量洪校友會黃埔學校4年級 前鋒