容易出事
早前，浙江一個網上討論區曾經有一個化名小王嘅網友聲稱，自己曾經做過男保母，而喺保母生涯當中，曾經與女主人發展感情。
小王幾年前因為成績唔好考唔上大學，惟有返鄉下幫父母打理一間士多以維持生計。可惜，士多生意淡薄，想儲番一筆老婆本根本冇可能，與此同時，父母年事已高，令小王下定決心到城市打工。呢個時候，小王從報章見到一段「白領高薪聘請男保母」嘅廣告，於是小王就膽粗粗應徵。由於小王本身相貌堂堂，加上身形頗為健碩，所以被陳姓少婦睇中，成功被聘為男保母，負責照顧家中因為車禍而癱瘓嘅丈夫。小王每日嘅工作，除咗煮飯、洗衫以及幫男主人清潔之外，屬於白領嘅主母亦經常吩咐佢相隨出席應酬活動，令小王有如被包養嘅小白臉一樣。有一日，雙方因為酒精影響而發生關係，令佢哋日後更加似一對情人！
後來，小王因為抵受唔住罪惡感，於是請辭離去，到今時今日仲為此事覺得後悔。
色情陷阱
小王嘅故事並唔係單一事件，因為對行情熟悉嘅人發現，近年好多招聘男保母嘅廣告，背後其實大有蹺蹊。只要翻開內地報章嘅招聘欄就會發覺，招聘男保母嘅廣告唔會刊登喺家政訊息廣告版，反而會出現於服務性行業嘅招聘版，而大部分標明「招聘男保母」嘅廣告，就夾雜於「女子俱樂部招聘男服務生」、「酒吧招聘男服務員」嘅廣告當中，心水清嘅朋友一定知道要請男保母嘅僱主有特別目的啦！
曾經應徵過男保母嘅何先生就表示：「早前我試過應徵男保母，當我打電話詢問詳情嘅時候，電話另一端嘅小姐就話，工作主要係陪主人食飯、飲酒、行街，至於家務方面其實並唔重要，而月薪大概係二三千蚊一個月。及後，我根據小姐提供嘅地址上門面試。而面試嘅時候就由一位打扮非常入時嘅年輕男人主持。佢一見到我就讚我幾靚仔，身形仲幾Fit，亦提議我不如由佢轉介去做男公關招呼闊太，可以搵更多錢咁話。呢個時候我就知道，請男保母其實等如請男公關喇！」
好氣好力
由於內地好多白領階級，每日都要返朝九晚五，而「男主外、女主內」嘅傳統觀念已變，不少夫婦都會雙雙出外打工。當然，將老幼留喺家中梗係唔會放心啦！所以，佢哋會聘請保母幫手照顧。
近期，原以女性佔大多數嘅保母行業出現驚人嘅變化，因為有唔少男士加入保母行業！而事實上，男保母的確擁有優勢，首先以體格而言，男人通常比女人更有氣力，對於家中有體弱老人家以及長期病患嘅僱主嚟講，男保母體力較好，幫手上落輪椅或者上落床鋪就輕鬆好多啦！另一方面，男保母亦可避免男主人見色起心，做出一切勾勾搭搭嘅不軌行為，令主母格外安心。不過，內地有好多男保母都係受聘於失婚少婦又或者係闊太，當中更加發展出不倫之戀添！
深圳首現
其實一般嘅男保母都係規規矩矩，甚少有色情勾當，而根據業內人士指出，近年男保母之所以同色情勾當拉上關係，原因同深圳嘅特色男保母有關。因為呢種特色男保母標榜經過嚴格訓練，懂得按摩、推拿，可以幫僱主舒筋活絡，本身冇咩問題。但係後來就有人掛住特色男保母嘅名義從事色情活動，專門引誘闊太，所以就令人對男保母印象有所改變！而根據業內人士估計，呢類有蠱惑嘅男保母只不過佔一成左右，所以絕大部分男保母都係正正經經，腳踏實地工作。
撰文：賢