Big Shot大賽球員
入到季後賽，球員心理質素尤其重要，始終都係淘汰賽，每球波都可以主宰勝負，所以大賽球員往往喺季後賽大派用場。過往最出名嘅大賽球員必數「Big Shot Rob」荷利，呢位六呎十吋前鋒經常喺關鍵時刻施展三分絕殺神功，結果佢亦因為咁攞到七隻冠軍指環，仲多過「波神」米高佐敦。
拓荒者萊爾刺客本色
通常把握關鍵一擊嘅球員，都係隊中嘅主將，好似高比拜仁或者勒邦占士咁，不過高比仔射失最後一擊屢見不鮮，所以球星都唔一定頂得住呢種壓力。今季較令人記憶猶新嘅Big Shot球員有拓荒者靈魂萊爾，佢心理質素向來穩定，多次喺常規賽hit the buzzer射入超遠三分波，季後賽一定要留意呢位新紮師兄。
至於另一位擅射關鍵波嘅球員，就係馬刺嘅鄧肯，呢位沉默球星向來視壓力如無物，亦因為咁，佢曾領馬刺四奪總冠軍，三次當選為總決賽MVP，射入關鍵球多不勝數。可惜第六人真路比利早前宣布提早收咧，削弱了馬刺的奪冠機會。
昔日關鍵先生︰荷利（火箭、馬刺、湖人）、柏臣（公牛）、卡爾（公牛）
Overall整體
以前嘅NBA，一人之力都可化腐朽為神奇，好似張伯倫、「J博士」艾榮，甚至乎「波神」米高佐敦，都可以屢創神迹攞冠軍！但現代籃球就唔得啦，就算你有個MVP高比拜仁喺手，若果身邊冇加素或者奧尼爾，入到季後賽一樣畀人㩒住砌，所以整體實力絕對勝過超級球星。
若論平均實力嘅話，衞冕冠軍塞爾特人會係最佳一隊，「綠衫軍」今季保留冠軍陣容，「三巨頭」再加上中鋒柏堅斯及控衞朗度，各個位置都甚具級數。尤其朗度今季表現大躍進，得分、助攻、籃板及偷波等各項數據都大幅提升，與籃網嘅迪雲夏里士一同晉升為NBA一線控衞，相信塞爾特人喺今季會更為穩定，更勝上季。
「大帝」麾下無弱兵
至於另一支東岸勁旅騎士，其整體實力亦相當不俗，內線有硬橋硬馬嘅華拿祖及伊高斯卡斯，而外線則有非常射得嘅莫威廉士及韋斯，再加上「大帝」勒邦占士嘅串連，阿Bob認為騎士實力仲未見底，只係除占士之外，其餘四人都略欠星味而已。
強於整體戰的近屆總冠軍：活塞（03/04）、馬刺（06/07）
Bench板櫈力量
每屆季後賽長達兩個月，若然要取得總冠軍，至少要過四關，最多會打成廿八場賽事咁多！呢個漫長戰爭，一定要有足夠人手，先可以完成大業，所以板櫈深度，絕對係奪冠重要元素。
吸取近兩季教訓後，騎士明白到板櫈深度重要性，所以縱然加入咗莫威廉士，仍保留原有兵馬，以備不時之需。現時騎士後備席分量十足，好似賓華萊士、丹尼爾吉遜、薩比亞及季中加盟嘅經驗老手祖史密夫，全部都有力擔當正選，板櫈算係聯盟中最強。
魔術金塊後備最削
至於同屬東岸嘅塞爾特人，後備亦甚具級數，皆因有星級後衞馬貝利降薪加盟做第六人，此外艾迪侯斯嘅三分波亦係重要武器，季後賽可大派用場。至於喺常規賽打得好好嘅魔術同金塊，板櫈深度均唔足夠，季後賽會好輸蝕。
西岸方面，唔好睇小拓荒者，因為該隊後備席上還有上季狀元奧登、於京奧表現突出嘅鬥牛士費南迪斯，同埋打得撞得嘅歐羅，拍得住一啲中游球隊嘅正選陣容。
今季後備力量強橫球隊︰塞爾特人、騎士、拓荒者
撰文：Bob Leung