常規賽差唔多到尾聲，東、西岸季後賽資格大部分席位都名花有主，尋日爵士作客贏黃蜂之後，亦鎖定能夠躋身西岸季後賽；至於西岸老八位置，亦好大機會由達拉斯小牛奪得，事關佢哋尋日大勝鳳凰城太陽一四○比一一六，拋離對手成條街，有四場勝仗在手，如果出唔到線真係要打屁股！
贏多一場即晉級
小牛尋日贏波後，已經同排第九嘅太陽拉開距離，除非佢哋喺餘下五場常規賽輸晒，而同時太陽又贏晒，否則小牛贏多一場，就肯定取得季後賽入場券。講到呢場波最大功臣首推傑特，事關佢全場射入十九分，仲交出二十次助攻，成為NBA史上第二老取得二十次助攻嘅球員，同時超越魔術莊遜，進佔NBA史上助攻榜第三位。嚟緊小牛嘅目標，就係要進佔西岸第七，事關佢哋希望首圈避開「一哥」湖人，爭取闖入次圈。
爵士鎖定季後賽
至於爵士同拓荒者亦喺西岸攞到季後賽資格，爵士作客以一○八比九十四擊敗黃蜂，其中迪倫威廉士為球隊貢獻「雙雙」，攻入廿一分及十一次助攻，不過拓荒者雖然攞到入場券，但尋日就以八十八比一○二輸畀火箭，狀態認真一般。