本文重點
縱然火箭嘅阿杜文及姚明，齊齊當選三月份西岸最佳教練及球員，但火箭面對西岸一哥湖人，依然毫無板斧！尋日湖人喺主場以九十三比八十一輕鬆贏波，今季四次面對火箭贏晒，輸波嘅火箭如今已跌出西岸前四，隨時錯失季後賽首圈主場優勢。
作客去到洛杉磯嘅火箭，上半場表現不俗，尤其憑藉姚明嘅制空權攞到唔少優勢，結果兩軍打成四十四平手，「小巨人」姚明兩節後獲得十三分及六個籃板球，係當時最高得分。不過，一踏入第三節，湖人就向對手施壓拋開分數，縱然火箭喺末節一度追成一分之差，可惜球員始終唔夠冷靜，關鍵時刻再次被湖人拋離，最終湖人贏十二分，成為今季第二支奪得常規賽六十勝嘅球隊。
今場湖人中鋒加素打得最好，攻入廿三分及十個籃板球，而高比拜仁雖然僅入二十分，但佢今場嘅三分球六射四中，表現可圈可點。至於火箭，姚明下半場只係得三分進帳，全場攻入十六分、十個籃板球及六個封阻，再一次喺關鍵時刻打唔出表現。火箭輸波後，現時總成績為四十八勝廿八負，已被拓荒者搶走第四位置。
艾佛遜背傷提早收咧
另方面，活塞射手艾佛遜宣布因背傷提早收咧，肯定緣盡季後賽。其實艾佛遜早前已經復出打咗三場賽事，不過其後曾發表不滿做活塞後備嘅言論，或因此成為收咧嘅原因之一。