本文重點
杜域侯活延續「魔獸」傳奇，喺魔術對熱火一戰，杜域侯活摘下十八個籃板球，令佢嘅籃板球數量累積至五千零六個，超越名宿張伯倫，成為NBA史上最年輕搶到五千個籃板球嘅球員，同時協助魔術以一○一比九十五擊敗熱火。
助魔術作客贏熱火
當魔術對熱火打到第三節剩番兩分五十九秒，杜域侯活搶到職業生涯第五千個籃板球，令佢以廿三歲一一二日嘅年齡，成為NBA史上最後生達到呢個成就嘅球員，打破張伯倫保持多年嘅廿五歲一二八日紀錄，而之前更加冇球員喺廿四歲前達標。
有球評家話評論杜域侯活去到張伯倫嘅級數似乎太過，因為張伯倫讀完大學先開始打NBA，只用兩個半球季就完成創舉，而杜域侯活係高中生直升NBA，開始打波時仲未夠十八歲，用咗近五個賽季先達標，兩者起點唔同，基本上性質係唔同。
除咗籃板球，杜域侯活亦貢獻廿二分，協助魔術作客以一○一比九十五擊敗有韋迪助陣嘅熱火。韋迪雖然射入全場最高嘅四十二分，但其他隊友發揮唔掂，佢哋依家排東岸第五，如果再輸落去，隨時跌落第六，季後賽第一圈就要對塞爾特人，聽朝對小牛真係不容有失。
（有線165台周四早上8時30分直播）