政情：半日爛4日用品 鄒幸彤自封黑仔王
支聯會副主席鄒幸彤早前因涉嫌呼籲市民參加未經批准的六四集會，被控一項煽惑他人明知而參與未經批准集結罪，早前獲准保釋。佢尋日喺Facebook話自己係無敵黑仔王，仲要半日內整爛咗4樣日用品，究竟發生咩事呢？
叫大家離佢遠啲
佢首先貼文形容自己「今日真係超級無敵極度黑仔」，叫大家離佢遠啲喎。之後佢再貼文，話原來今日半日內佢經歷咗爛杯、爛電腦、爛窗簾同埋爛袋，爛咗4樣嘢啊！佢問「仲有咩可以爛？」，唔單止爛嘢，佢又話今日「叫邊樣無邊樣」，就連上個網都狂斷線啊。佢之後又加多句「仲未計社會大事」，睇嚟可能係暗示民陣尋日都宣布解散。
可能見佢自稱「無敵黑仔王」，有網民就留言覺得黑唔黑仔係心態問題嚟，又有網民話「還有愈來愈黑暗」，亦都有網民叫佢休息一下啦！