政情：劉頴匡玩數字遊戲 還押半載當一年
前民間集會團隊發言人劉頴匡因參與去年民主派「35+」初選，涉嫌違反《港區國安法》，被控串謀顛覆國家政權罪。佢同其他涉案民主派人士一樣，已被還押近6個月，不過佢嘅Facebook專頁尋日上傳其親筆信，竟然形容今個月10號係一個別具意義嘅日子，事關佢哋終於還押咗一年喎。唔通佢計錯數？
話自己唔係坐到懵咗
劉喺信中就解釋「唔係坐到懵咗唔識數日子」，原來佢喺度假設一件案件量刑起點係一年，認罪加上行為表現良好，可以各扣減三分之一刑期，實際判囚日子就只係5個幾月，而10號正正係同案47人被還押5個幾月嘅日子。佢仲話自己喺囚中真係好無聊，所以成日都要用刑期嚟玩數字遊戲。
不過，佢提到依家案件進度，話仲未審訊，連同案情相關文件都未收到，就已經住咗相當於量刑起點一整年嘅刑期，認為好荒唐。又話依家面對嗰幾單案件嘅總量刑起點大約係10幾年，所以即使過咗「一年」都談不上「可喜可賀」喎。