政情：與「室友」爭執 帶返警署調查 區議員王進洋揭欠供MPF
尋日朝早有消息指，離島區議員王進洋因涉及一宗與強積金有關而被通緝嘅案件，被帶往大嶼山北警署接受調查。又指王因為同女朋友喺寓所內發生金錢糾紛，警方接獲女方報案登門調查從而揭發案件。之不過，王後來透過社交平台交代爭執嘅經過，又拒絕承認報案人係女朋友喎，事件真係撲朔迷離。
王進洋解釋，該位報案嘅女士只係同住嘅「室友」。話說「室友」因政治立場同家人反目，王見對方日子難過於是就「接濟」咗佢差唔多一年，直至王前晚同手足食飯，言談間得悉「室友」只係假裝受害，其實佢同家人嘅關係並非惡劣，王感到受騙相當不悅，返到屋企同「室友」發生拗撬，期間王嘅打火機被對方掟爛，仲將酒樽掟到成地都係。去到尋日朝早，王同「室友」攤牌要求遷出，誰知對方反應好大，又指王欠下一萬元未還，王要求出示借據但不果，於是對方報警，結果搞到要上差館調查咁話。
否認報案人係女朋友
事件經過講得咁清楚，但應該冇咩人感興趣，不過有網友就質疑王進洋再三強調自己冇女朋友，話佢乘機徵女友喎，又有人比較關心，王到底要欠供幾多期員工強積金，先至被人告上官府。