政情：無立法強制佩戴 議員斥荒謬 巴士上層設安全帶淪裝飾
為保障乘客安全，現時好多載客車輛都有裝設安全帶，但都要乘客肯扣上安全帶先至奏效。2018年大埔公路發生嚴重傷亡嘅巴士翻車意外，檢討委員會其後建議運輸署成立專責巴士安全小組。而立法會財務委員會尋日就通過在運輸署開設職位領導小組，期間議員田北辰指出小巴司機唔想「做醜人」，執法又「唔嗲唔吊」，唔少乘客都漠視扣上安全帶嘅法例。至於現時新出廠嘅巴士上層座位已裝設安全帶，但現行法例並無要求乘客佩戴，直言「仲荒謬，邊個會戴」。
運輸署署長羅淑佩回應話，署方正研究喺小巴乘客座位上方安裝顯示燈以及加設發聲裝置，當系統偵測到有乘客未扣上安全帶，就會發出聲響或作出呼籲廣播。
擬加發聲裝置提醒
羅認為一旦發出聲響，其他乘客會作出提醒，而有關人士都「唔會想成車人望住佢」。羅又以上個月喺沙田載有55名學童嘅校巴交通意外為例，話幸好學童有佩戴安全帶，反映有關設備相當重要，而事件對署方「係好好嘅提醒」，承諾會立法要求巴士乘客佩戴安全帶。