政情：社福項目免立會把關 議員斥挾道德高地攞錢
為鼓勵非政府組織透過擴建、重建，提供或者增加相關福利設施，多年前政府曾推出私人土地作福利用途特別計劃，但後來話為咗加快項目推行，5年前停止將部分項目額外徵求立法會財務委員會同意嘅做法。議員謝偉銓（Tony）就話做法容易令立法會對公帑運用把關不力，每次政府以社福為由、企喺道德高地問立法會拎錢，議員都好難拒絕囉！
話說私人土地作福利用途特別計劃旨在鼓勵非政府機構利用原址提升設施同埋增加宿舍，減少社福服務嘅輪候時間。之不過，計劃嘅開支相當龐大，政府前幾年向財會申請注資，之後為避免對庫房同納稅人造成長遠及較大負擔，任何涉及每年逾1,000萬港元經常開支嘅社福項目，都需要財會審批，由議員把關。
轟文件不足 計劃欠清晰
但係政府突然喺2016年話，停止需要財會額外批准嘅做法，以加快計劃推行喎。Tony就話政府至今未清晰交代計劃預算開支係幾多，每次以社福為由問財會索取額外注資，議員又點會反對呢？但長遠起見，文件不足、計劃唔清晰等問題都係要改善，佢話政府唔好以為次次企喺道德高地，就可以順利拎到撥款呀！