政情：邵家臻踎監貼士 威化餅引蛇蟲鼠蟻一網打盡
多名民主派人士因去年35+初選案而涉違《港區國安法》並遭到拘押，不時都會託親友向外界透露獄中情況。前社福界議員邵家臻，前年就因違法佔領行動案而經歷8個月嘅鐵窗生涯，佢尋日接受網台訪問時就大爆當年坐監嘅一項「消遣」，就係用食物引出蟑螂，再趁機一網打盡啊。
邵家臻話天時暑熱，蛇蟲鼠蟻都特別活躍，獄中不時都可以見到蟑螂同埋老鼠。佢話曾經試過無聊冇嘢做，就用威化餅嘅餅碎將蟑螂引出嚟繼而用腳踩死！雖然蟑螂數量多到嚇死人，但都畀佢全數殲滅喎。
冬青膏牙膏搽頭頸消暑
夏天除咗蟲患，仲有就係熱浪，邵話每日工作完返到監房，都會成身汗，佢惟有坐定定，除晒衫，用記事簿嘅封面搧風撥涼，但亦唔可以太大力撥，以免再出汗，之後再擦爽身粉。佢仲話有囚友會將冬青膏或者牙膏搽喺額頭同埋後頸，令身體涼快啲，消暑手法真係無奇不有啊。
邵憶述當時，佢通常喺上午做運動，之後就被安排約莫中午12時半沖涼，但佢就好希望晚上7點返回囚倉前再沖一次涼解解暑。不過邵依家都重獲自由有得涼冷氣，至於目前被還押嘅前議員同事可能就要再諗吓消暑方法喇！