政情：樓貴死結難解 議員激辯爆火花
香港地少人多，覓地建屋相當棘手，一眾議員尋日喺立法會，就如何增加土地供應同解決住屋問題而各抒己見，其中議員邵家輝提到「如香港唔輸入外勞，你啲樓想平都難」而惹來具工會背景嘅議員麥美娟（Alice）炮轟，地產及建造界議員石禮謙就睇唔過眼，加入罵戰反駁Alice嘅觀點。
Alice點名批評邵家輝嘅說法，質問對方「你冇記性（口架）？你同我都咁上下年紀，你唔記得80、90年代啲樓貴定平啊？嗰陣時有外勞咩？」
輸入外勞 辣（興）麥美娟
佢認為土地房屋已經畀資本家壟斷，亦係造成加劇貧富差距嘅根源，怒斥邵點解仲提出加劇貧富懸殊嘅建議。Alice強調政府唔應該放任發展商囤積土地，建議政府設土地閒置稅，以增加成本嘅方式嚟減低財團囤地嘅意欲，增加政府收回土地嘅籌碼。
石禮謙就話議員只係坐喺冷氣房討論社會問題，佢反問即使講得偉大，但最後「做咗啲咩？」石禮謙話香港有好多土地，問題在於政府係咪有政治勇氣同決心解決問題。佢反駁麥美娟嘅講法，話香港土地唔係由地產商控制，強調最大土地佔有者係政府，政府可賣地、批地、改變土地用途等，重申喺政府高地價政策下，「麵粉貴，麵包梗要貴」喎。