政情：拍片推廣警隊「P-TV」平台 鄧炳強發放正能量
警務處處長鄧炳強近期常常粉墨登場，一時做軍裝警員協助同事，一時帶齊裝備同前線同事做反恐工作，而今次一哥終於做番一哥，幫警隊最新推出嘅「P-TV」平台做宣傳。新平台主要係內部資訊分享居多，頭炮就推出「我是警察」嘅短片創作活動，畀一眾同袍分享做警察嘅初心喎，最後仲同大家講一句「我最鍾意嘅就係做警察」。
迎合時代 新方式支援前線
警隊最新一段短片中，處長一開頭就提到自己近期經常拍片，唔係想做演員，而係為咗迎合時代，用新嘅方法向外界傳達訊息；同時又希望自己支援到前線同事，畀到正能量同事。一哥又講到前年黑暴事件係警隊轉捩點，由呢個時候開始警隊就製作短片同外界溝通，發放新訊息，同時希望呢類訊息都可以同內部分享，所以設立「P-TV」內部資訊分享平台，發放正能量之餘，仲會鼓勵到身邊嘅人。