政情：鄧以海督師 號召力滿分 海關青少年計劃 兩日招80新血
提起學生課餘參加嘅活動，唔少人會諗起少年警訊，但其實各紀律部隊都有推出唔同嘅活動畀青少年參加，好似海關咁，今年暑假就特別推出咗一個名為「Customs YES」嘅全新青少年計劃，短短兩日，已成功招募超過80名會員，點解有咁好成績？全因海關關長鄧以海前日親自去香港國際教育展設立嘅攤位進行招募，鄧Sir果然夠號召力，連同計劃年初進行招募到而家，已吸引660名青少年參加。
鄧Sir話，希望透過「Customs YES」教育導向活動，鼓勵青少年發揮潛能，加深佢哋對海關執法和便商等工作嘅認識，培養青少年價值觀及對社會嘅歸屬感，年滿12歲至24歲的青少年可以加入成為會員。
暑期實習 有得玩有嘢學
佢仲話「Customs YES」喺嚟緊暑假推出兩項重點活動，包括「暑期訓練營」及「暑期實習計劃」，其中「暑期實習計劃」提供同海關及相關業務夥伴涵蓋唔同行業嘅實習職位，畀年滿18歲或以上的「Customs YES」會員參加，有得玩，又有嘢學，鄧Sir認真諗得周到。