政情：動議辯論拖完又拖 高佬賢地獄黑仔王
議員具監察政府施政嘅職責，可以提出無約束力議員議案，對公眾關注嘅議題表達意見或呼籲政府跟進，之但係就需要抽籤先可以喺會上辯論。申請失利次數最多嘅漁農界議員何俊賢（高佬賢）早前終於中籤，原本可以喺今個星期立法會大會上討論佢提出嘅議案，但最後要延至下周會議再作處理，莫非佢仲係擺脫唔到「黑仔王」稱號，一中籤就出師不利？
申請失利11次 中籤仲要等下次
高佬賢過去嘅申請失利次數高達11次，自上任以嚟都未獲編配過辯論時段添。其實佢之前亦試過申請議員議案，但見到黨友葛珮帆提出嘅議案同教育有關，所以就先讓路畀葛。不過，作為抽籤箱入面最後一個人選嘅佢，終於都可以喺今個星期嘅會議上，討論佢所提出有關寮屋及農用構築物過渡政策嘅議案。
點知尋日會議大部分時間用咗去審議《2021年完善選舉制度（綜合修訂）條例草案》，立法會主席梁君彥喺會議結束前就話，早前已經徵詢過高佬賢同另一位提出議案嘅議員意見，決定留番下星期三大會再處理喎。