政情：牙膏止痕 淋濕地就寢 林卓廷獄中土法消暑

話說阿廷皮膚上一度消褪嘅熱痱又再出現，雖然已經用藥，但反反覆覆無法斷尾。於是阿廷就搽小量牙膏喺熱痱上面，再用水輕輕搓開，毋須用水清洗，就可以享受短暫嘅清涼及止痕功效。

另外，阿廷又記得以前睇電視嘅知識節目，知道頭同頸係人體散熱最快嘅部位，所以佢平時都會用濕毛巾抹頭同頸，又或者索性「洗濕個頭」以保持頭髮蘸濕。至於夜晚就寢嫌熱，阿廷會選擇瞓地下，又或者先用水淋濕塊地然後躺臥，涼浸浸有助入眠。

尹兆堅生熱痱出汗癬

至於肥尹亦同樣受熱痱困擾，皮膚更出現汗癬，目前已按醫生指示搽藥膏，但又要不斷抹汗，盡量令身體乾爽同正常排汗。兩個人若果有機會相遇，阿廷會唔會將牙膏嘅妙用，過兩招畀肥尹呢？