政情：建制派獲委公職 泛民葡萄至極
深水埗區議會尋日開會討論興建地區康健中心嘅項目，誰知一個單純嘅民生議題又演變成政治爭拗。話說主席楊彧發現食物及衞生局未有事先諮詢佢哋嘅意見，就委任當區建制派區議員何坤洲，為新界南及九龍康健中心管治委員會嘅委員，質疑政府玩小動作。但同場嘅建制派區議員就譏諷話，政府當然選擇委任為地區做實事嘅議員喇，唔通委任即將被取消區議員資格（DQ）嘅泛民咩！
不滿架空區議會 做法欠尊重
楊彧喺會上聲稱並非針對某一位區議員，但佢不滿政府今次嘅委任，事關過往都係由區議會推薦代表加入政府成立嘅委員會，今次食衞局只係透過電郵通知佢委任決定，其他區議員都唔知情，認為做法對區議會欠尊重，形容係「政治大過健康」。副主席伍月蘭亦都同一鼻孔出氣，質疑政府既唔委任當區區議會嘅正、副主席，又唔委任同健康事務有關嘅工作小組主席，又批評何坤洲係最少發言嘅議員，話委任一個資深啲嘅建制派議員，懂得問問題同畀意見都好吖。
建制反駁 指何啟明將被DQ
雖然何坤洲懶理伍月蘭嘅批評，但何嘅黨友劉佩玉就睇唔過眼，直斥泛民區議員嘅發言，與其「吃不到的葡萄是酸的」，點解唔向政府自薦加入委員會？劉又點名參與去年民主派「35+」初選而被控涉嫌違反《港區國安法》嘅當區區議員何啟明，話大家心知肚明喇，難道要政府委任一個即將被DQ嘅區議員？何啟明聞言立即反駁，話自己仍然係無罪之身，點解唔可以接受政府委任？何啟明跟住就向與會嘅食衞局代表講，話希望政府可以委任佢，幫手出謀獻策喎。
食衞局代表解釋，話人選嘅決定係考慮到委員會希望吸納區議員聲音，以及對象嘅才幹同興趣等，亦會持續同其他區議員溝通。不過一眾泛民區議員唔收貨，深水埗區議會最後通過一項臨時動議，強烈譴責食衞局冇諮詢區議會嘅情況下，委任何坤洲作為委員會委員，要求即刻撤銷任命同重新諮詢區議會，何坤洲同劉佩玉就投下反對票。