中環出更：斷食體重易反彈 陳玉芬：定時飲食最健康
香港人生活節奏急速、食無定時，好容易出現腸胃問題。有見及此，中區獅子會就製作健康短片，教大家點樣預防同治療喇！當然聽醫生講清楚，點樣做對腸胃最好，而又要跟住做，健康啲先係對自己好。
卓妮日前出席中區獅子會嘅活動，陳偉聰醫生話曾有病人因工作壓力而經常肚痛，甚至一落街就想去廁所，其實都係屬於「腸易激綜合症」嘅一種，一定要多加注意呀！香港浸會大學協理副校長（中醫藥發展）、曾肇添中醫藥臨床研究教授卞兆祥都話，處理相關疾病要從藥方、食療同埋做運動三方面入手，得閒仲可以撳吓穴位紓緩症狀添！
聽到兩位醫生咁講之後，在場唔少女士都話獲益良多。中區獅子會前會長陳玉芬（Fanny）話，之前聽佢夫婿嘅朋友介紹斷食排毒，於是兩人試過每年有一次連續7日唔食嘢，自己就順手減肥、夫婿就當係排毒。不過，後來發覺斷食過後體重好容易反彈，就選擇一個禮拜斷食一日就算，雖然期間冇胃痛，但就唔知點解會頭痛喎，而聽完醫生講話要定時飲食，佢哋都打算一日食番三餐。
唔單止Fanny有「偏方」，中國港澳三○三區前總監冼姵璇同馮妙雲都有方法。冼姵璇話身體唔舒服嘅時候會發出信號，事關佢過往長期嗜辣，後來年事漸長就注意番均衡飲食，如果發覺腸胃唔舒服，就會諗番前一日食咗乜嘢，繼而注意番同埋戒口喇！不過佢都有自己嘅排毒秘方，話每次腸胃唔舒服就會食辣嘢，食完容易清腸胃，但提醒效果會因人而異。
馮妙雲：戒糖及澱粉
馮妙雲就話先前睇過醫生，發覺自己糖尿指數偏高，開始戒糖、戒澱粉質食物，同時每日會行半個鐘當健身。佢Keep Fit嘅方法就係飲健康飲品，但就會加啲辣椒粉，因為佢鍾意食辣之餘，仲話辣椒粉都可以提供熱量維持身體所需o架！
卓妮