中環出更：倡海洋公園設名牌特賣場 容海恩「P圖」粗糙惹嘲笑
海洋公園負債纍纍，連番向立法會財務委員會提出撥款申請，日前仲通過68億元嘅「重生方案」。曾喺會議上建議喺海洋公園開設名牌服飾平價特賣場（Outlet）嘅議員容海恩（Eunice），日前就繼續解畫，仲以一張單手叉腰嘅合成相（P圖）作為配圖添！
話說海洋公園嘅重生方案中，其中一項係將山下園區外判，免費開放畀市民。Eunice喺會上就建議開特賣場，但海洋公園管理層就表明唔打算複製另一個商場。隨後Eunice話可能海洋公園對佢有誤會，亦同意唔應該興建大型商場。佢話去過日本神戶嘅三田高級Outlet，話屬半開放式同低密度，入面仲有餐飲同娛樂設施，認為呢類格局嘅Outlet先接近市民心中所想，指依家有機遇，覺得可為海洋公園嘅地皮增值，亦可以做到協同效應。
「張相嘅光唔啱方向」
但網民似乎唔太受落。由於Eunice所用嘅合成相係將自己一張單手叉腰嘅相，同神戶三田高級Outlet嘅相併埋一齊，有網民留言批評幅合成相，話張相嘅光唔啱方向，仲話「P到咁都夠膽放出嚟」。
有網民仲話文中有段寫咗「除了神戶三田outlet外，在外地也有很多成功例子，例如日本的神戶三田高級outlet」，直指唔知佢寫乜。之不過事隔十幾個鐘後，Eunice已將呢句改寫咗，變咗係「除了神戶三田outlet之外，法國也有類似的綜合購物點如巴黎的河谷購物村」喇！
卓妮