政情：黎青龍不獲續約 徒弟陳沛然送金卡安慰
港大醫學院內科及肝臟科講座教授黎青龍不獲續約，預計會喺6月約滿。佢嘅徒弟兼醫學界議員陳沛然（Pierre）透露事件已經糾纏咗幾年，不過教授始終冇打算私人執業。Pierre仲話送咗張「金卡」畀教授，唔通係等教授唔開心嗰陣，可以隨意購物？
Pierre喺社交網站貼文指，自問資質愚鈍，並非黎嘅得意門生。而香港政治現況、立法會情形、疫情進展等事都令佢心情沉重，現時更添黎教授不獲續約嘅消息，都令佢涕零如雨，不知所言。佢透露續約嘅事已經糾纏多年，一路上同教授同行，當中有好多人同事，唔方便公開說明。更加有人託佢邀請教授私人執業，不過就被教授拒絕。
可隨時傳召請食飯
眼見教授唔開心，Pierre好大方咁送出一張「金卡」。用途係畀教授唔開心嗰陣，隨時傳召佢出嚟做飯腳，訴苦同分憂。教授有權揀日期、時間、地點以至菜式，而Pierre就負責埋單啊！