政情：任逾20公職 鄺美雲：學到好多嘢
唔少社會人士都會擔任各種公職以服務社會，但通常擔任幾個公職就已經手忙腳亂。本身從商嘅香港珠海社團總會會長鄺美雲（Cally），早前就轉戰公職，仲擔任20幾項職位添！真係諗到都覺得唔得閒呀，但因乜事咁鍾意擔任公職呢，莫非嫌唔夠忙碌？
話做人要老實同正能量
話說Cally早前出席網上節目嘅時候，就透露話自己正擔任逾20項公職，雖然覺得好忙，但都話心態最緊要，只要保持欣然嘅心態，就可以從每次服務當中得到提升。佢話每次活動同各界嘅人士接觸時，都會從中學到好多嘢，因大家個性同諗法不一，討論嘅時候自身都成長咗唔少。
之不過最近疫情咁嚴峻，會唔會少咗同他人接觸呢？Cally話都可以自己一個靜靜哋做嘢嘅，但工作始終要繼續，有時仲會開吓網上會議。佢提醒大家，話人一定要老實同埋保持正能量。之但係佢都坦言自己份人都容易急躁，所以每晚返到屋企都會自我檢討添呀！