政情：公民講場：減堆填起焚化爐 無板斧空談環保

本港每日都有廢物產生，堆填區早已不勝負荷，日前政府公布新一份《資源循環藍圖》就列出幾個願景，期望可以喺2035年達到零廢堆填。然而有環保組織指出，政府對於未來嘅環保工作並無新板斧，都係沿襲興建回收中心嘅思路，至於生產者責任計劃，以及即棄塑膠餐具管制就有排都未能落實，又話要興建新焚化爐添！雖然政府用「轉廢為能」嚟做包裝，不過點都掩蓋唔到焚化爐運作需要動用大量能源嘅事實，環境局局長黃錦星都係老老實實，由源頭減廢做起仲好啦。